ភ្នំពេញ៖ រាជរដ្ឋាភិបាលបានចេញអនុក្រឹត្យមួយស្ដីពីការគ្រប់គ្រង ការប្រើប្រាស់ និងការពារសុវត្ថិភាពទិន្នន័យអត្ដសញ្ញាណបុគ្គល ដោយប្រគល់សិទ្ធិដល់ក្រសួងមហាផ្ទៃប្រមូល ចងក្រង រក្សាទុក គ្រប់គ្រង និងការពារសុវត្ថិភាពទិន្នន័យដែលបានចងក្រង និងអាចអនុញ្ញាតឱ្យក្រសួងស្ថាប័ន អង្គភាពទាំងវិស័យសាធារណៈនិងវិស័យឯកជន ឬបុគ្គល ប្រើប្រាស់ទិន្នន័យអត្តសញ្ញាណបុគ្គលបានតែត្រូវរក្សាការពារការសម្ងាត់នៃព័ត៌មានឯកជនរបស់បុគ្គល សុវត្ថិភាព ភាពត្រឹមត្រូវ និងក្នុងគោលបំណងសុចរិត។

អត្តសញ្ញាណបុគ្គល សំដៅដល់ព័ត៌មានដែលអាចកំណត់បានអត្តសញ្ញាណបុគ្គលណាម្នាក់។ ទិន្នន័យអត្តសញ្ញាណបុគ្គលអាចជាទិន្នន័យអំពីឈ្មោះ ភេទ ថ្ងៃខែឆ្នាំកំណើត ទីកន្លែងកំណើត ទីលំនៅបច្ចុប្បន្ន ជនជាតិ សញ្ជាតិ រួមទាំងទិន្នន័យជីវមាត្រ ឬទិន្នន័យផ្សេងទៀតដែលទាក់ទងនឹងអត្តសញ្ញាណរបស់បុគ្គល។

ក្នុងអនុក្រឹត្យដែលចុះហត្ថលេខាដោយនាយករដ្ឋមន្ត្រីកម្ពុជា សម្ដេចតេជោ ហ៊ុន សែន កាលពីថ្ងៃទី២២ ខែធ្នូ ឆ្នាំ២០២១ បានបញ្ជាក់ថាទិន្នន័យអត្តសញ្ញាណបុគ្គលត្រូវការពារដោយក្រសួងមហាផ្ទៃ ហើយប្រសិនជាមានការស្នើសុំទិន្នន័យពីក្រសួងស្ថាប័នរដ្ឋត្រូវធ្វើឡើងដោយសេចក្ដីប្រកាសអន្តរក្រសួង ឬប្រកាសរួមរវាងរដ្ឋមន្ត្រីមហាផ្ទៃនិងរដ្ឋមន្ត្រី ឬប្រធានស្ថាប័នដែលស្នើសុំ។

ចំពោះស្ថាប័នឯកជនការស្នើសុំអាចធ្វើទៅបានលុះណាតែមានកិច្ចព្រមព្រៀង ឬអនុស្សរណៈយោគយល់គ្នារវាងតំណាងក្រសួងមហាផ្ទៃ និងប្រធាន ឬតំណាងស្ថាប័ន អង្គភាព ក្នុងវិស័យឯកជនដែលស្នើសុំ ខណៈបែបបទនិងនីតិវិធីនៃការស្នើសុំអត្តសញ្ញាណបុគ្គល ឬបញ្ជាក់ពីភាពត្រឹមត្រូវ ដែលស្នើសុំដោយសាមីខ្លួន ឬដើម្បីប្រើប្រាស់នៅក្នុងវិស័យយុត្តិធម៌ សន្ដិសុខ សណ្ដាប់ធ្នាប់សាធារណៈ ត្រូវកំណត់ដោយរដ្ឋមន្ត្រីក្រសួងមហាផ្ទៃ។

មាត្រា១១ នៃអនុក្រឹត្យនេះបានចែងថា៖ «ក្រសួង ស្ថាប័ន អង្គភាពទាំងវិស័យសាធារណៈ និងវិស័យឯកជន ដែលស្នើសុំប្រើប្រាស់ទិន្នន័យ អត្តសញ្ញាណបុគ្គល ត្រូវធានាថាទិន្នន័យដែលបានប្រើប្រាស់រួច មិនត្រូវបានរក្សាទុកក្នុងប្រព័ន្ធរបស់ខ្លួន និងមិនត្រូវចែករំលែកទិន្នន័យបន្តទៅភាគីផ្សេងទៀត ឬប្រើប្រាស់ទិន្នន័យប្រាសចាកពីគោលបំណងនៃការស្នើសុំនិងធ្វើឱ្យប៉ះពាល់ដល់សន្ដិសុខ សណ្ដាប់ធ្នាប់សាធារណៈឡើយ» ។

បើតាមអនុក្រឹត្យនេះ បុគ្គលដែលប្រព្រឹត្តល្មើសនឹងបទប្បញ្ញត្តិនៃអនុក្រឹត្យនេះ ក្រសួងមហាផ្ទៃអាចសម្រេចដាក់ទណ្ឌកម្មខាងវិន័យណាមួយដូចជា ការព្រមាន ការស្ដីបន្ទោស ការដាក់កំហិត ការព្យួរ ឬលុបចោលកិច្ចព្រមព្រៀង ឬអនុស្សរណៈយោគយល់គ្នា។ លើកពីនេះអនុក្រឹត្យក៏អនុញ្ញាតឱ្យមានការប្រើប្រាស់ច្បាប់ព្រហ្មទណ្ឌលើការបំពានលើបទបញ្ញាត្តដែលមានចែងក្នុងអនុក្រឹត្យនេះផងដែរ៕